اللي بيقاطع يقاطع الله لايقطعنا من رحمته

[ابو سارة]

السلام عليكم

حليب بنتي ساره العلبة الصغيرة قبل سنة ونصف تقريبا كان بـ 17 ريال والحين بـ 23 وبعض الصدليات بـ 24 يعني ارتفاع اكثر من 30%

اذا بقاطع الحليب واشتري لها حليب ثاني خذ سالفة ماتنتهي من مغص وترجبع و....و... .... الخ وابدفع لي ستمية ريال من دكتور لدكتور ومن عيادة لمستوصف ...

عاد بزران ذا الوقت يالله لك الحمد يشوف وجه الدكتور اكثر مما يشوف وجه ابوه ... تصدقون احيانا اشك ان البزر ياخذ عمولة من الدكتور
يالله انك تصلحهم يارب

احد الحلول المطروحه اني اشتري عنز وكل ماصاحت البنت لقمتها ضرع العنز وكل سنة وانتم طيبين ...
وعلى فكرة الوالده تقولي ان الاولين ( قبل النيدو ) كانوا يسوونها بس للامانه كانوا يسوونها مع البقرة مهوب مع العنز >>>> بيكحلها اعماها

في احد المجالس تحدث احدهم محتسبا الاجر - لاحرمه الله منه - عن مقاطعه الالبان ... ومن باب الطرح المفتوح وحرية التعبير وتبادل وجهات النظر والاريحية في النقاش والخ الخ الخ من ذا الهرج اللي اكتشفت لاحقا ان الخيشة منه بربع طرحت ( طرف ) من وجهة نظري والا الرجال تقول مقروص والا سبيت خواله .....!
ياللي فيك ومالا فيك وانت معول هدم وانت مثبط للعزيمه وانت مناصر للجشع وانت وانت وانت وآخرتها قفّلها نسبة بقوله اشك ان العلمانية غاسلتن عقلك >>>> صار فنيلة ماصار عقل

يابو الشباب روقنا ... يالحبيب هدي اعصابك .... يارجال ترا الجلطة كاثرة الحين ... يابن الاجواد خلاص اتوب .... عسى تدعسني سفينة اني ماعودها .... ماش الرجال مثل الدركتل اللي يسوقه ضرير واللي بطريقة مهوب لاهله

بسلامته ... تبي تقاطع قاطع الله يقويك بس اهم شي الروح الرياضية وسمعت انهم يمدحون الاخلاق ... بس انا مالك شغل بي ... ومانيب معلمك ابقاطع والا لا ..
خلني ابروح افكر بسالفة توني ادري بها ... امي تقول انها رقدت بالمستشفى ثلاثة ايام بعد ماولدتني ... وانا تلقفت وسالتها اجل من اللي ارضعني ( فرحان بصير عندي ثنتين امهات ) قالت ياوليدي ماخبر احد ارضعك وبيني وبينكم معذورات الحريم كل من شافتن طاحت من فوق الدرجه من الخرعه والا مولود بشنب حتى الممرضة لاجت تغير لي تغطت
والله اني شاك ببقرة كانت عند الوالد ... كل ماشفتها حسيت بالحقرص والبقرص داخل ضلوعي ...
المشكلة مهيب اني راضع من بقرة ... المشكلة باللي سويته بذيك البقرة ماينقال ولاينحكى ...
وتزيد الطامه لاقالي احد ان البر سلف والرد من عيالك ودي اقوله ياشيخ خذ ريالين ورح جب لنا خبز من بقالة اهمدوه بمدغشقر ولاتسرع ترا فيه رادار بعد بورسودان ونقطة تفتيش قبل بوركينافاسو

المهم ان الموضوع هذا ثرثرة من واحد فاضي ومنقفط من البرد ... بس اذا الموضوع ماعجبكم علموني واشيل والدينه ترا الناس اليومين اللهم ياكافي مايمديك تقول كلمتين الا متقفين ثواك وهوشتين بالقلب تشق بخاطره عاد وشلون لاصار القلب من حينه منشق على بقرة كحيلة نحيلة اصيلة وبنت اجواد هيفاء الودّ ناحلة القدّ مفعمة بالاحساس ومشرأبة بالحنان وترا مشرأبة فيها همزة بالنص لاتنسونها تراني تعبت وانا ادورها


للجميع التحية