الفرسان 3

[الاميره المحرومه]

**ضيفنا اليوم غير اب لطفلة واحده حفظها الله له ورعاها من كل مكروه. وجعلها ذخرا وفخرا لوالديها ,ربط اسمه باسمهااهنا ابو......,,

كتب في الاسهم..
يزورنا بين الفينه والاخرى في الاستراحه..اترككم مع الضيف الممتع ومع حوارنا معه..

-ماسبب اختيارك هذا الاسم ( ابو سارة) ؟

عليكم السلام ورحمة الله وبركاته وحياك الله اختي وشهر مبارك عليك وعلى الجميع ان شاء الله ...

سبب التسمية لأن ابنتي اسمها ساره وهي وحيدتي في الذرية الله يخليها لي ويخلي لكم عيالكم ولله الحمد انا من اخترت الاسم

-أين تقيم نفسك بين أعضاء المنتدى ؟
من اقلهم علما واصغرهم شأنا واحوجهم لمساعدة اخيه او اخته

-عطيت شحاذ 20 ريال ؛ وبعدها لقيته باليورومارشيةعند المحاسب يسدد له 1000 ريال قيمة بلاي ستيشن و بعض الألعاب ؛ وش ردت فعلك؟

يقول المصطفى عليه الصلاة والسلام (التمس لأخيك سبعين عذرا فان لم تجد له فقل لعل له عذرا لا أعلمه ) فربما كان الشحاذ يشتري لاحد ما تلك الالعاب ...
وحتى لو ايقنت انه يشتريها لنفسه ... الاساس في الصدقة هي النية ( انما الاعمال بالنيات وانما لكل امرئ مانوى ) فالله سبحانه يمنح عبده جزائة عند نيته القيام بفعل الخير وهو لم يفعله فما بالك بمن فعله ... ولعلني كسبت من هذا الشحاذ اجرين .. اجر الصدقة .. واجر الغبن
واخيرا ... لاننسى ان الله سبحانه قد احتسب ( المحروم ) من الذين تجب عليهم الزكاة .. والمحروم من لديه مال ولكن لايقدر على انفاقه مرضا في نفسة عافانا الله واياكم جميعا ... فقد يكون منهم ...

-كم عمرك أول مرة صمت ؟ وبأي مرحلة دراسية ؟
اذا ماخانتني الذاكرة فمن اول سنة دراسية كنت اصوم ... ولكن الصيام ذلك الوقت كان في عز الحر كما سيكون باذن الله السنة القادمة والنهار طويل .. فاحيانا نصوم صيام ( الدجاجة والديك ) كما كانوا يسمونه كبار السن عندنا وهو صيام الى الظهر وبعد ماناكل وجبة نمسك الى المغرب ...

-وأنت صغير كم مرة أفطرت وماحد درى عنك؟
هههههههههههههههه .... والله ما اذكر اني سويتها .... التربية القديمة كانت تستند على التخويف بشكل كبير ... كانوا يخوفوننا بالمقرصه الحاميه والنار والقبر والعقرب وابو ذنيب ووين ماتروحين خوف في خوف .. لذلك كان الرادع داخلي اكثر منه خارجي

-موقف محرج أو طريف في رمضان لن تنساه ؟

الموقف اللي ما انساه ماكان لي بشكل مباشر ولكن عجزت انساه ... كنت موظف حكومي وكان فيه اثنين من الشباب مصرقعين بجد ... واحد ايام رمضان دخلوا الاثنين وكل مامروا عند احد تغير وجهه ...!
المهم استدعاهم رئيس القسم وقالهم ياشباب اذا انتم ناوين تفطرون بكيفكم بس لاتفطرون تونة ترا ريحتكم واصلة آخر الشارع ...

-طبق ماتتحمل غيابه عن الفطور ؟

انا فطوري في الغالب تمر مع قشطة وقهوة .... بس ....
واذا رجعت من الصلاة لي تفاهم ثاني مع السفرة ... وعلى فكرة ... انا شخص غير ذواق يعني مايهمني وش آكل والبركة في العزوبية عشر سنين اللي علمتني انه اذا مالقيت شي تاكله كل تبن ونم
لكن الشوربة مايختلف عليها اثنين

-السحور اللي تحس انه فعلاً يلبد بطنك ؟
الرز ... ثم الرز ... ثم الرز ..... وبعدها يجي البشاور والمقلوبة والرز الابيض والرز الاحمر اهم شي حاجه اسمها رز

-عادةرمضانية تتمنى تنتهي ؟
عادة ( عشاء الوالدين ) .... نعم هي فيها مبرة للوالدين لكن الرسول عليه الصلاة والسلام يقول ( شرّ الطعام طعام الوليمة يدعون اليها الاغنياء وينسى فيها الفقراء ) او كما قال عليه الصلاة والسلام ... وهذا اللي حاصل للاسف ... لو تم توزيع تكلفة عشاء الوالدين فكم عيلة راح يكفيها ... ؟؟
وفي الغالب اكره وامقت العزايم في رمضان بشكل كبير


-عمل أو فكرة تتمنى من الحكومه ينفذونها في رمضان ؟
اتمنى ومن اعماق قلبي اعادة النظر في الدوام الرمضاني لابارك الله فيمن قررة ... انا مادري ليش في رمضان تنقلب الدنيا فوق تحت ... خلو الدوام الرمضاني زي ماهو ومنها يحرص الناس ( خصوصا الطلاب ) على النوم بدل مايقتلب ليلهم نهار ونهارهم ليل واعتقد لو كان الدوام من سبعة والساعه 12 يطلعون الناس كان افضل بكثير...

-كنت واقف عند الإشارة وأذان المغرب قريب و اللي وراك يدقق بواري ويشر بيده يبيك تقطع الاشارة ؛ وش بتسوي ؟
\

اضرب له طناش متوازي الاضلاع ... واذا حصل طناش مكعب يكون احسن
وكمعلومة يمكن احد يستفيد منها البعض يعتقد انه يجب عليه اكل اي شي مع الاذان لكي يتمم صيامه وهذا غير صحيح ... ففي الحديث ( اذا اقبل الليل من هاهنا وادبرت الشمس من هاهنا فقد افطر الصائم ) وقوله افطر الصائم اي انه فطره قد تم سواء اكل شئ او لم يأكل .....

-جيت للبيت و لقيت أخوك عازم 5 مصريين و 8 هنود و بنغالي ونيجيريين ؛ اكيد تفطر معهم بس أي جنسيه تبي تصف معهم؟
اشوف السفرة لو فيها صحن رز اصف لحالي ..... >> مدمن رز

-من هو أول عضوتتوقع أن يرد على هالمقابلة ؟
سعودي والا ام يوسف

-عضوتتمنى رجعته وفقدته؟
شارت ... او بالاصح الاستاذ شارت لأنه راعي معروف علي ومنه تعلمت الكثير ... ولاننسى اخت رجال بارك الله في جهودها

-عضوتقدره في المنتدىوبماذا تلقبه ؟
والله كثير اللي لهم تقديرهم لكن ابو عبدالعزيز ( متكهرب ) بخفة دمه ورحابة صدره اخذ في القلب مكانه ... اما افضل لقب لابوعبدالعزيز فهو ( دخون ) وهو البخور ... اذا حضر عطر المنتدى واذا غاب قيمته باقيه فيه ... وانا اتمنى الاعضاء اللي استفادوا من تواجده ومن توصياته ( سواء هو او غيره ) ماننساهم من دعواتنا في هذا الشهر الفضيل ....

-مكان في البيت تحب تدخله وشو وليش؟
بيتي صغير او بالاصح هو شقة لذلك كل الاماكن مشغوله ... لكن بيت الوالده وهو البيت اللي ترعرعت فيه كل زاوية فيه لها ذكرى في قلبي ... خصوصا السطح



-أكثر سؤال قعدت تفكر فيه ؟ ولماذا ؟
السؤال اللي قبل هذا ... خصوصا اني متواجد الاسبوع هذا في بيت الوالده فقعدت افكر وين اكثر مكان قربا للنفس ...




شكرا لهذه الاستضافه ..
لكم التحيات وتقبل الله منا ومنكم الصيام والقيام


نشكر اخونا ابو ساره على استجابته للدعوه..

ولكم الفرصه في سؤاله لمده يومين,,