بنك البلاد قلب المداحسه بقلب المفاعصه

Saudi · 22-06-2007, 10:19 PM

كنت مستغرب من قلّه الزحمه عند بنك البلاد لا ناس ولا زحمه داخل ولا حتى بالمواقف

قلت ياولد ليش ما افتح فيه حساب ببالي حساب اخليه للاكتتابات

والله واطبح بالموتر واتوجه لهم واسفط عند البوابه ونزل وما امداني ادخل الا هالشاب قدامي يفتح لي الباب ويخامسني << انا تحمست بغيت احبه قلت يمكن يعرفني ولا واحد من الجماعه

ما امداني افتح فمي الا كلمات حلوه واتونس تطلع من هالشاب (طال عمرك ، سم ، آمر ، تفضل ، استريح ، قهوه ولا شاي ولا عصير ،) << لا والولد اسنونه تلمع بيض

انا مو فار اللي لعب بعبي الا تمساااح يلعب بعبي شككت وش السالفه التفت سيارتي لا يكون اني سارق سيارة جارنا ال bmw ؟؟؟الا لا والله سيارتي الخجمى القديمه حتى بالعلامه منكسرة المرايه الجانبيه

حيروني ازياده يوم جلسني وانواع الخدمات حتى بغيت اطلب غداء واستحيت
ومايمديني افتح فمي الا اذن الشاب الموظف عند فمي مقرب << امسوي فيها منصت لي ويدنق ارقبته لي

جت القهوه ثم الشاي واجلس اتجغم ساعه وهو ينتظر ولا يقولي اخلص وش تبي ؟؟؟
هذا وانا جاي للفرع عادي مادخلت لقسم ال vip وش بيسون هذولي الثانين فينا اكثر من الاول ؟؟؟؟

مابطول عليكم

خشيت بالسالفه وقلت ابي فتح حساب وتداول بخليه للاكتتابات فقط وبرسل عليك بكره مجموعه تبعي تفتح لهم حسابات ومحافظ .

قال ابشر طال عمرك وما امداني اشفططططط العصير الا وخلص طلبي وقالي جب الاخوان بكره وابشر بفتح كل شيء لهم

انا طلعت منهم كأني طاااوووس بس اغااغي مبسووط وافكر اكنسل من الجزيرة وسامبا واحول عليهم ياحليلهم

بس رغم الاستقبال الحلو حاس انهم دججججه ونكبه وماش مستوى !!!!

بالفعل اكتتبت بجبل عمر بعد انقطاع دام سنه عن الاكتتابات << كذا نفسيا ما اكتتب

اتصلت بالموظف وقلت له بيجونك الربع السبت تفتح لهم حسابات وتضبط امورهم وبيكتتبون ببدجت

قالي : طال عمرك مو داخلينبالاكتتاب احنا .
وشوووووووووووووووووووووووووووووووووووووووو

كيف مو داخلين وش هي مزاجيه تدخلون باللي تبون وتطنشون اللي ماتبووون ؟؟؟
شكلكم حتى التغليف مالكم حق الاكتتاب فيه بعد . وشكلكم بس اكتتبتوا بجبل عمر
وانا اقووول وش هالفضاوه عندكم ما فيه عملاء والبنك 25 ساعه فاااضي

ياخي كان قلت لي من اول ،، ان كان هذا اوله ينعاف تاليه ، مادام باكتتاب ماتدخلون فيه اجل بالامور الثانيه وش بتسوون

حولني على المسؤول عن الاكتتابات ؟؟؟؟
طال عمرك اتصل على الهاتف المصرفي .
طيب

بالفعل اتصلت ومن يد نشيط الى يد نشيط ومن موظف لموظف لين جيت لواحد شكله دلوووعه البنك والكل بالكل بخصوص امور الاكتتابات

قلت له يااااخي وش ذنبنا احنا العملاء تحرمونا من الاكتتابات برغم ان مافيه الا انتم مو مشارك ، ترى الدعوه مو مزاجيه ولا انتم حرين بقراراتكم لان العميل هو الاهم بالمرتبه الاولى .

قالي : طال عمرك ولا تزعل هدي نفسك .. احنا دخلنا بجبل عمر وكيان .
قلت : ماتكفي ليش مازي الباقين تكتتبون بكل شيء (ان كان محرم لا تدخلون،،اما تخلطون واتخبصون على كيفكم مايصلح )<< بصراحه انا اصلا كنسلت الحساب وجالس بس اطفي حررره بنفسي واكون عللله وانشب لهم واحشرهم بس

قالي : ولا يهمك << جلس ايخبص ولا يدري وش يقول

قلت ياولد فكك منهم واتركهم بكره مع الوقت يفشلون اكثر ماهم فاشلين ولا يقدرون ينافسون الموجودين ويختفون

بس كل اللي حاز بنفسي ان هالاستقبال والتعامل يروووح فشوووش وحزنان اني مابشرب عصير عندهم

<<< بنك البلاد قلب المداحسه بقلب المفاعصه

ابو سارة · 23-06-2007, 11:20 AM

ذكرتني ببنك الاستثمار قعد موظفهم يطق فوق راسي الين جبت له عميل حط عندهم مبلغ محترم جدا وانا اللي ادير محفظته ...

يوم جربت نظامهم لقيته يجيب السبع علل دفعة واحده .........

وغبي وبطيئ والارقام لازم تقلبها من الجهاز انجليزي والا ماتفرق الثلاثة من السته والاوامر ( غالبا ) ماتتنفذ الا اذا طلعت روحك والا تفرق بناقص عن السوق

وانا اقول صويحبي ما امداه يدخل الا صافقينه بتسهيلات وبدون عمولة ويقول انه مابقي شي ماطلبه ونفذوه له ... حتى يقول بغيت اقولهم اظافر رجلي طويله كان عندكم احد معه مقص

وللامانه الكلام هذا له سنة تقريبا ولا ادري اذا غيروا نظامهم والا للحين يجيب الهم للمبسوط ...

لكن من اشوف شعارهم لونه بني اغسل ايدي وركبتي من تعديل مرتقب