يابنات تعالن انفعن لو مرة في حياتكن

[الاميره المحرومه]

شرايك بالفلوس ..

وهم بسوون فيها اللي يبون..


وتعطيهم بطريقه حلوه


تقدم الفلوس في باقه ورد

بتطلع جنان

[~*الفراشـــــة*~]

الي بالثانوي هذي حسب ميولها يا ابو ساره وش تحب

فيه محلات اكسووارات مشهوره اكسسواريز عندهم أشياء تجنن

تقدر تشتري لها منها كم شيء غريب والشنط مره روعه اشتري لها

شنطه ماركه وتكون عمليه راح تفرح فيها مره وش رايك بعبايه ؟

تكون غاليه وقماش حلو مع طرحتها بتطلع خيال راح تستخدمها دائما

يعني الواحد موب دائما يشتري عبايه وش رايك برضو بتي شيرت مع اكسسووار حلو

لا تنسى تحط معاها اشياء مثل حصن المسلم وكتاب مفيد لمن هم في سنها

[Saudi]

بس مادام امك مثل امي حقت ابيزه هههههههههه

مررر العطار وخم لك حلتيته على مرّه واسويدا وعنزروت

[~*الفراشـــــة*~]

اقتباس المشاركة الأصلية كتبت بواسطة Saudi بس مادام امك مثل امي حقت ابيزه هههههههههه مررر العطار وخم لك حلتيته على مرّه واسويدا وعنزروت

هذي الأشياء يقدسونها الأمهات بشكل عجيب

[شهد الحياة]

السلام عليكم ورحمة الله وبركاته

شدني عنوانك ابو سارة ..وقلت يابت هذا ابو سارة يااااماااا انتفعت بمواضيعه وتوصياته ..اعصري المخيخ وانفعي ولو مره في حياتك

وبعد العصر والتمحيص والتدقيق افرج المخيخ عن التالي:

اولا كم عمر الوالده ......بطلت الوالده في الهديه

ثانيا اذا تبي هديه تبقى تذكار لها ممكن تشتري لها سلسال ذهب على شكل قلب مجوف يفتح وتكتب داخله كلمه حلوه لها وتحط اسمك

ممكن مايكون قلب فيه محلات ذهب - (لاتورطني معرف وين هي) -تحط لك صورتك مدري كيف تسويها ولكنها تتلون وتبدو لك مثل الطيف ..الصراحة شفتها في وحده وعجبتني كثير سألتها عنها قالت لي هديه من بنتها روح محلات الذهب وأسأل

ممكن تهدي لها مدري ايش يسمونه - بوصف لك وعسى بس اعرف اوصف -اظن يسموه درع المهم شفت الهدايا التقديرية اللي بتكون على شكل صحيفه مذهبه او زجاجيه بعضها يوضع داخل علبه مخمليه ويكتبون فيها عبارات شكر وتقدير .. بيهدوها لمدير مدرسه مثلا او طالب متفوق او مدير نادي ..يارب عرفتها المهم تشوف لك وحده فخمة وتكتب لها فيها اهداء جميل وتذيله بأسمك ممكن تحطها في غرفة نومها او في الصالون وكل ماتشوفها بتدعي لك

ممكن تهدي لها ادوات منزليه انت ادرى ايش بتحتاج ..ياحب الحريم لشغلات البيت

هدية المصحف اللي ذكرته الفراشه كان في القائمه واحبذه لها فهو من افضل الهدايا التي تثاب عليها

حاول ان تبتعد عن اهدائها ملابس .. فالذوق عندكم معشر الرجال شئ بديع

يازين ماكتبت ..كله مدري وايش هو ومدري وايش اسمه ..لمعرفتي بأنك لبيب والبيب بالأشارة يفهم

تقبل مروري

[ابو سارة]

اقتباس المشاركة الأصلية كتبت بواسطة منااير ويييييييييييييييييييييييييييييييييييه وانا اقول ايش هالكرم عندك ,,, اثاريك كارفن هالضعيفات الله الغني مابا شي

حرام عليك انا طالع من البيت من اكثر من عشر سنوات

اقول اشربي فينتو وتنحي مالك والهدايا

[ابو سارة]

اقتباس المشاركة الأصلية كتبت بواسطة الاميره المحرومه شرايك بالفلوس .. وهم بسوون فيها اللي يبون.. وتعطيهم بطريقه حلوه تقدم الفلوس في باقه ورد بتطلع جنان

فلوس ... هاه ...

من جاب طاري الدراهم

من يطق الباب ....

ياحبكن يالحريم للدراهم اشوى ان قارون ما اعرس والا كان راحت دراهمه

الاميرة المحرومة

مشكورة على الاقتراح ...

احس الهديه اطعم شوي >>>>> راسب بالتعبير

يعني الفلوس اذا واحد مالي خلقه وبيعرس اعطيه فلوس منها يفكني من مشاوير السوق ومنها اني افتك من لسانه مايكون ما اهديتني واذا بيطولها معي اخذت فلوسي وخليته

لكن الهدية لها معاني كثيرة واهم معنى لها برايي اذا شفتيها بعد فترة وخصوصا اذا كانت الفترة طويلة ... تصدقين عندي شنطة وفيها هدايا من ايام ماكنت بالمتوسط

[ابو سارة]

اقتباس المشاركة الأصلية كتبت بواسطة ~*الفراشـــــة*~ الي بالثانوي هذي حسب ميولها يا ابو ساره وش تحب فيه محلات اكسووارات مشهوره اكسسواريز عندهم أشياء تجنن تقدر تشتري لها منها كم شيء غريب والشنط مره روعه اشتري لها شنطه ماركه وتكون عمليه راح تفرح فيها مره وش رايك بعبايه ؟ تكون غاليه وقماش حلو مع طرحتها بتطلع خيال راح تستخدمها دائما يعني الواحد موب دائما يشتري عبايه وش رايك برضو بتي شيرت مع اكسسووار حلو لا تنسى تحط معاها اشياء مثل حصن المسلم وكتاب مفيد لمن هم في سنها

ورطنا ..... وفي رواية اخرى طبعنا ....

مو المشكلة ان سوالف الحريم انا ما اعرفها خير شر

تقولين لي اكسسوريز وشنط وقماش وفساتين وتيورات والمكنكش والمحنكش والشيفون والمزيون والمشوين والتنتر وابو عنتر


كل الشغلات هذي ماعطاني الله فيها ... قبل اتزوج اذا سافرت برا المملكة ادور على محل تكون فيه بائعه ... وادخل واقولها ترا ماعندي ماعند جدتي بسواليف الحريم اختاري لي انتي

بس برضه شكرا لجهدك معي يالفراشة وتعبتك معي الله يعطيك العافيه

بناءاً على الاقتراح اعلاه يحال الموضوع الى ام سارة لاتخاذ اللازم

[ابو سارة]

اقتباس المشاركة الأصلية كتبت بواسطة Saudi بس مادام امك مثل امي حقت ابيزه هههههههههه مررر العطار وخم لك حلتيته على مرّه واسويدا وعنزروت

ياحبي لك ياسعودي

امي الله يحفظها باقي لها كيلوين عنزورت وتصير رئيسة مجلس ادارة العنزورت لتملكها الحصة الاكبر

بس خل عنك ... قسم بالله من اربع سنين وانا ماعرف الا علاجهن الله يحفظهن ... خرابيط المستشفيات لاتهمك ....

منول الزكمة تلعب بحسبتي اسبوع

الحين اذا مرت من جنبي الزكمة تلطمت وانحاشت

زنجبيل وقرفه وفكس وابو فاس ومسمار .... الخ الخ الخ ...
وكلهن حار بحار احس اني شوي وافقع

[ابو سارة]

اقتباس المشاركة الأصلية كتبت بواسطة ~*الفراشـــــة*~ هذي الأشياء يقدسونها الأمهات بشكل عجيب

والله يالفراشة فيه استشاري سوداني في مستشفى مشاري ووديت له بنتي سارة الله يحفظها ... سالني والدتك موجودة قلت ايه قال لي الدكتور يقول بلسانه ( اذا قالك الدكتور- اي دكتور - حاجه وقالت لك والدتك حاجه سيب اللي قالك الدكتور واتبع كلام الامهات )

قلت له بس امهاتنا مايعرفنا الا مره وفكس .. قال لي العلاج الصحيح هو المره والفكس ..!

الحين الوالدة المستشارة الخاصة لسارة وجدتها من امها الاخصائي المناوب

ماذبحني في فترة من الفترات الا اني اذا اوجعني شي رحت للصيدليه علطول ... الحين المره خير بديل ... لو اللابتوب يهنق معي كان ذريت عليه شوي محلب ومرة